CEBU, Philippines — Hingpit ng gihuboan og otoridad ang International Boxing Association (IBA) sa International Olympic Committee human nga ang Court of Arbitration for Sport mibasura sa apelar sa maong asosasyon.
Atol sa Tokyo Olympics, ang IOC maoy misuperbisar sa boxing events tungod sa matud pa naghinobrang kurapsyon, wala magreporma ug wala motuman sa ilang mga gipangsaad nga kausaban sa ilang pagdala sa boksing ang IBA.
Ang IOC mibakwi sa ilang pag-ila sa IBA human sa 69-1 nga boto atol sa gihimong extraordinary session sa miaging buwan. Human sa ilang suspension niadtong 2019, gihatagan og kahigayonan ang IBA nga mag-usab ug repormahon ang ilang asosasyon, apan milabay nalang ang upat ka tuig wala gihapoy nahitabo.
Ang IBA gipangulohan karon sa presidente niini nga Russian nga si Umar Kremlev nga naputos og mga kontrobersiya ug pasangil nga kurapsyon.
Matud pa sukad nga gipamunoan ang IBA sa kaniadto diktador sa Pakistan nga si Anwa Chowdhry gikan 1986 hangtud 2006,daghang kurapsyon ug pabor-pabor nga nahitabo.
Misamot pa gyud kini sa dihang ang mipuli sa renda ang Uzbek nga si Gafur Rakhimov ug gisundan ni Kremlev.
Gani sa miaging semana, gikatahong miadto sa Phuket, Thailand si Kremlev aron agnihon ang pangulo sa Asian Boxing Confederation (ASBC) nga si Pichai Chunhavajira nga dili mopadayon pagtapon sa World Boxing.
Ang World Boxing usa ka bag-ong organisasyon nga nagtinguhang maoy mopuli sa IBA. Gilangkoban kini og interim board nga dunay representante gikan sa US, UK, Germany, Netherland, Pilipinas, Sweden ug New Zealand.
Si ABAP president Ed Picson misuporta sa pagkamugna sa World Boxing ug usa siya sa mga nangusog pagpreserbar sa integridad sa maong sport. Si ABAP chairman Ricky Vargas mipadala na og suwat ngadto sa World Boxing nga nagpahibalo sa intensiyon sa Pilipinas nga magpasakop kanila.
Tungod sa nahitabo sa IBA, ang IOC lang gihapon unya ang mag-superbisar sa umaabot nga boxing matches sa Paris Olympics.—IBM