Hawks mipalagpot ni coach Mcmillan
Gipalagpot sa Atlanta Hawks ang head coach nilang si Nate McMillan.
Si Hawks general manager Landry Fields mipahibawo nga ang assistant coach nilang si Joe Prunty maoy magsilbe nilang interim head coach sa kasamtangan.
"Decisions like these, especially in-season, are always extremely difficult, but we believe it's in the best interest of our team to move forward with another voice leading the way," matud pa ni Fields.
Nets mihigot ni Vaughn
Human gi-trade ang superstars nilang sila si Kevin Durant ug Kyrie Irving, ang Brooklyn Nets mipahibawo nga nagka-uyon sila sa sa usa ka multi-year contract extension uban sa coach nilang si Jacque Vaughn.
Ang 48-anyos nga si Vaughn nakadaog og kampiyonato isip player sa San Antonio Spurs niadtong 2007. Nahimo siyang head coach human ang Nets ug si Steve Nash nag-iyahay og dalan niadtong Nobiembre 1 sa miaging tuig.
Ubos sa paggiya ni Vaughn, ang Nets miposte og 32-19 rekord. Ikalima sila karon sa East bitbit ang 34-24 nga baraha.
Ball dili na makaduwa
Dili na makaduwa pa si Chicago Bulls guard Lonzo Ball sa nahibiling bahin ning season tungod sa nahiaguman niining angol sa iyang tuhod.
Ang 25-anyos nga si Ball, nga maoy No.2 overall pick sa Los Angeles Lakers naidtong 2017 Draft, nakaduwa sab sa New Orleans Pelicans sa wala pa gi-trade ngadto sa Bulls sa miaging tuig.
Apan si Ball nakapakita'g aksiyon sud lamang sa 35 ka duwa uban sa Chicago sa wala pa siya mayayay niadtong Enero 2022. Na-operahan siya duha ka higayon apan wala na gyud mabaliki sa maayo niyang porma.