CEBU, Philippines — Si Trae Young mipaulbo og 43 puntos sa dihang giputol sa Atlanta Hawks ang 11 ka sunod-sunod nga daog sa Phoenix Suns, 124-115, sa NBA kagahapon didto sa State Farm Arena sa Atlanta, Georgia.
Hait kaayo si Young nga mipasud og 16 sa 25 niya ka mga itsa.
Nakasikit pa unta ang Suns ngadto na lang sa sayes puntos apan si Young miposa og hagpok kaayong tres aron inaton og balik ang labaw sa hawks ngadto sa nuybes puntos, 122-113, sa nahibiling 36.8 segundos sa duwa. Si Young gipaluyohan nilang Kevin Huerter ug John Collins nga mitali og 19 puntos matag usa alang sa Hawks nga nagtangag na karon og 25-26 nga baraha.
Si Devin Booker mipupo og 32 puntos alang sa Suns, nga nadakin-as ngadto sa 41-10 apan pabiling naghari sa Western Conference standings. Sa laing duwa, gipakgang sa Miami Heat ang tulo ka sagunson nilang pilde human gipayaka ang San Antonio Spurs, 112-95.
Si Tyler Herro maoy nangu sa Heat uban ang 24 puntos.
Dako sab og naambag si Bam Adebayo nga mikimada og 18 puntos ug 11 ka rebounds ug ingon man sila si Jimmy Butler ug Duncan Robinson nga parehong mihipos og 18 puntos.
Sa uban pang mga resulta, si Anthony Edwards miposte og 25 puntos ug si Karl Anthony-Towns dunay 21 puntos ug 14 ka rebounds sa dihang gitukob sa Minnesota Timberwolves ang Detroit Pistons, 128-117, alang sa ikatulo nilang sunod-sunod nga daog, samtang si Pascal Siakam mibugha og 21 puntos sa dihang gi-ihaw sa Toronto Raptors ang Chicago Bulls sud sa overtime, 127-120, alang sa ikaupat nilang sagunson nga daog.