CEBU, Philippines — Sigun sa gipangagpas sa kadaghanan, usa ka eksplosibo ug huego todo nga binukbukay ang miulbo tali nilang Tyson ug Deontay Wilder sa ikatulo nilang panag-abot ibabaw sa ring.
Ug si Fury gihapon mao ang dunay katapusang katawa human gipalukapa niini si Wilder sa ika-11 nga hugna sa mainit nilang kumbati kagahapon didto sa T-Mobile Arena sa Las Vegas Nevada.
Gawas nga nadepensaan ang iyang WBC heavyweight title, gi-inat sab ni Fury ang perpekto niyang record ngadto na sa 31-0 nga gidayan-dayan na karon og 22KOs.
Samtang si Wilder nakatilaw sa ikaduha pa lamang niining pidle sa 45 ka away, pulos gikan sa mga kamot ni Fury.
Nalingaw og maayo ang bagang panon sa mga fans nga nanan-aw sa kulbahinam kaayong engkuwentro nga miresulta ngadto sa lima ka knockdowns.
Kaduha natumba si Fury, samtang si Wilder tulo ka higayon nga nalukapa.
Naabot ang katapusan sa hugyaw kaayong sangka sa dihang si Fury mipatupa og makabungog nga tuong suntok nga nakapatukay-ang ni Wilder sa hingpit sa ika-11 nga hugna.
Si Fury nagtinguha nga makaharong sa umaabot ang modaog sa rematch nilang Anthony Joshua ug Oleksandr Usyk aron makab-ot ang iyang damgo nga mamahimong undisputed world heavyweight champion.