CEBU, Philippines — Ang komunidad sa basketball dinhi sa Sugbu nagwad-an og usa sa labing lig-on niining tigpaluyo gumikan sa pagtaliwan sa notadong businessman-sportsman nga si Jeremias Pardillo "Jerry" Oberes ngadto sa laing kalibutan niadtong Martes. Nag-edad siya og 62.
Sa hilom ug layo sa eksena, si Oberes sa kanunay nagpasiugda og mga liga amateur man o commercial sa milabyang mga katuiga sa wala pa ang pandemiya. Apil sadili makihalimtan niyang mga nabuhat mao ang pagpahigayon sa tinuig nga Emil’s Fresh Chicken Cup diin mikumbati ang mga tang-an nga commercial ballers ug collegiate stars sa Sugbu nga nahimo ang traksiyon sa pista sa Barangay Lipata-Linao sa Minglanilla matag Agosto.
Si Oberes sab maoy responsable sa pagdala sa mga koponan sa Cebu Schools Athletic Foundation, Inc. (CESAFI) sa ilang dapit. Kabahin kini sa iyang misyon paghatag og kalipay sa mga moluypo sa Mingnilla pinaagi sa makalingaw nga aksiyon sud sa korte nga iyang ilibre sa kanunay sa publiko ug dili pa gani siya mangayo og rehistrasyon sa mga partisipante. Dili lang kay mao ra kana, nakaporma sab siya og Cebu team nga misalmot sa pipila ka mga torneyo dili lamang dinhi sa probinsiya apan hasta sab sa ubang dapit sa Visayas partikular na didto sa Leyte.
Hugtanon sab nga gisuportaan ni Oberes ang Pilipinas Commercial Basketball League (PCBL), usa ka commercial amateur basketball tournament nga naghatan og oportunidad sa mga batanp-ong basketbolista nga mabaid og maayo ang ilang abilidad. Wala mahibaw-i sa uban, si Oberes usa sab sa labing dako nga gispaluyo sa sukad sa pagkabanhaw niini pipila ka tuig na ang milabay ubos sa paningkamot ni kanhi Cebu First District congressman ug karon Talisay City Mayor Gerald Anthony “Samsam” Gullas, Jr.
Nagasahan og manggihatagong kasingkasing, si Oberes labing mahinunduman sa iyang mga kawang-gawa pinaagi sa pagpasiugda og mga liga diin ang kita iyang iapud-apud niadtong mga labing nanginahanglan sa katilingban. Sa paghatag niya og kinabuhi sa Cebu commercial basketball ug ingon man higayon niadtong mga nangambisyon nga atleta sa kaugalingon niya paagi sa nanglabyang mga katuiga, mao kini ang nagsemento sa kabilin ug legasiya ni Oberes.
Sa iyang pagpanaw, gibiyaan ni Oberes ang kapikas niyang si Rowena, mga anak nga sila si Michael Manuel ug Emil Lee, ug mga igsoon nga sila si Roy, Jun, Luz, Wenifreda, Suzie, Bella, Gerald ug Nardo.