CEBU, Philippines — Usa ka Boholana ang naglingkod karon isip world No.1 junior weightlifter sa iyang dibisyon.
Sa labing uwahing rankings sa International Weightlifting Federation (IWF), si Vanessa Sarno gikan sa Tagbilaran City maoy nalista nga No.1 sa women's junior 71 kg category uban ang best lift nga 229 ka kilo.
Ang 17-anyos nga si Sarno unang mihimo og impresyon sa dihang mitampo siya og tulo sa 12 ka gold medals nga nahakot sa Pilipinas sa 2018 Indonesia Weightlifting Championships didto sa Bali.
Usa ka tuig ang milabay, mipugnit siya og duha ka bulawang medalya ug usa ka silver sa 2019 Asian Youth and Junior Weightlifting Championships didto sa Pyongyang, North Korea.
Taliwala sa pandemiya sa miaging tuig, si Sarno mipupo og tulo ka golds sa virtual 2020 IWF Online Youth World Cup nga gi-host sa Peru. Iya kining gisundan og duha ka golds ug usa ka silver sa 2020 Asian Weighlifting Championships didto sa Tashkent, Uzbekistan.
Sa iyang mga nakab-ot, si Sarno gipanglantawan nga mosidlak isip sunod nga bitoon saPhilippine weightlifting.