Padayong hanap ang senaryo sa kon kinsay makontra sa idolo natong si senador Manny Pacquiao sa pagkatkat niini og balik sa ring.
Ang bugtong eight-division world champion sa kasaysayan gikatakda untang makigbinukbukay sa wa'y pildeng WBO welterweight champion nga si Terence Crawford karong Hunyo 5 didto sa tunga-tungang sidlakan.
Apan natibugsok ug nikolapso kini dili pa lamang dugay human ang mga mipasalig nga mobubo og pundo alang sa maong higanteng away didto sa Abu Dhabi, United Arab Emirates wala makatuman sa ilang saad.
Balik ba sab sa uno ang mga nagduma sa karera ni Pacman.
Dunay hinuo'y kahayag nga midan-ag ni Pacquiao human mapapha ang giatngan unta nilang engkuwentro ni Crawford.
Kini human milutaw ang pangan sa wa'y pidleng WBC ug IBF welterweight champion nga si Errol Spence nga maoy lagmit sunod makaharong ni Pacquiao. Segun sa milugwa nga mga taho, hapit na maselyado ang ilang bugno. Si Pacquiao naglungot-lungot nga gyud nga makaaway og balik. Wala na siya makapakita pa'g aksiyon sukad iyang gibuntog si Keith Thurman aron langkaton ang WBA 'Super' welterweight title niadtong Hulyo 2019 o dul-an sa duha ka tuig na ang milabay.
Kinahanglan nga moaway na gyud si Pacquiao kay nagdagan ang iyang orasan. Mag-43 anyos na siya karong Disyembre ug nagplano siya nga modagan sa labing taas nga posisyon sa nasud sa bugnong lugaynon sunod tuig.
Apan hangtod nga wala pa'y kontratang napirmahan, wa pa'y kasiguroan kon kinsa'y sunod niyang makontra. Kini pintahonon pa.