Taliwala ning pandemiya, dili na kapugngan nga mahitabo ang kasaysayan gumikan kay mosikad na ang labing unang Pilipinas VisMin Super Cup ugmang adlawa didto sa Alcantara Civic Center sa lungsod sa Alcantara habagatang bahin sa Sugbo.
Ang Super Cup maoy labing bag-ong professional basketball league sa Pilipinas ug labing una nga nakabasi sa habagatang mga probinsiya sa nasud. Pito ka teams ang magkumbati sa Visayas Division nga mao ang ARQ Builders/Lapu-Lapu City Heroes, MJAS Zenith-Talisay City Aquastars, KCS-Mandaue City Computer Specialists, Tabogon-Cebu Voyagers, Dumaguete Warriors, Tubigon-Bohol Mariners, ug Siquijor Mystics.
Ang torneyo modagan og dili mominus 25 ka adlaw ug ang mga entranteng koponan moduwa sud sa bubble ubos sa estriktong patakaran sa panglawas ug kaluwasan. Samtang ang Alcantara maoy main host, ang tanang mga naglangkob sa liga adto gipahiluna sa silingan niining lungsod nga Moalboal.
Matud pa ni Super Cup COO Rocky Chan nga agi'g pagtambayayong sa LGUs sa hintungdang mga lungsod, ila nang giplastada ang tanang mga lagda alang sa kaluwasan sa tanan. Duna na sila'?y nakahan-ay nga mga contingency plan ug andam sila nga aksiyonan kon simbako lang dunay magpositibo sa gikahadlokang virus samtang nagdagan pa ang ilang kompetisyon.
Mao nang si Chan nagkanayon nga hugot kaayo ang pagpatuman sa tanan nilang mga health protocols. Gawas sa P50,000 nga multa sa team, kadtong mapamatud-an nga nakalapas sa mga health protocols sa liga palayason gilayon sa bubble.
Sa pagporma dayon na ngadto sa pagpa-andar sa liga, dili lalim ang naagian nilang Chan, secretary-general coach Lito Caro ug sa uban pa nilang mga kaubanan luyo ning Super Cup. Daghan sila og mga hagit ug pagsulay nga naagian ilabi na kay daghan kaayo ang mga restriksiyon ning puntoha sa krisis. Og bisan pa man dunay nangatras nga mga players tungod sa kontrobersiyal nga kamandoan sa laing liga nga daw wala makauyon sa maanindot ug dalaygon nilang gibuhat, wala kini makabalda kanila.
Walay makapugong sa Super Cup pagpadayon sa ilang misyon. Labaw sa pagsigpat og potensiyal nga mga talento sa probinsiya ug paghatag og gamay'ng kasadya sa natad sa paugnat sa kusog nga taud-taud nang namingaw tungod ning nagpadayong pandemiya, labing mahinungdanong katuyoan ug tumong sa Super Cup mao ang paghatag og kapanginabuhian niadtong pipila nga nagsandig sa duwang basketbol ilabi ning panahon sa kalisdanan. Dalaygon na, makasaysayanon pa.