Giatngan sa mga boxing fans tibuok kalibotan kon kanus-a mobalik og away si senador Manny Pacquiao ilabi na kay wala na kini makapakita'g aksiyon sud sa dul-an duha ka tuig. Ang bugtong eight-division world champion sa kasaysayan katapusang mikatkat sa ring niadto pang Hulyo 2019 didto sa Las Vegas diin iyang gipukan ang kanhi wa'y pildeng si Keith Thurman pinaagi sa split decision aron sakmiton ang titulo isip WBA 'super' welterweight champion.
Buot unta ni Pacquiao nga modepensa sa iyang trono duha ka higayon sa miaging tuig, apan nadiskaril ang iyang mga plano tungod sa pandemiya. Bisan kausa wala siya makasalida.
Bisan pa man niini, daghan gihapon kaayong mga bug-at ug dekalibreng pangan ang nakalinya aron lagmit makaharong ni Pacquiao sa panahon nga mopakita na kini og balik sa iyang abilidad.
Ang unang labing init nga gihisgutan mao ang sangka nilang UFC superstar Conor McGregor nga kon nahulma pa lagmit mokita og dili momenos $100 million. Apan napaga kini ug sa kalit nahanaw sama sa usa ka aso human si McGregor gi-knockout ni Dustin Poirier sa ikaduhang hugna sa ilang rematch dili pa lamang dugay.
Kay wala na si McGregor sa eksena, milutaw dayon ang pangan sa wa'y pildeng interim WBC lightweight champion nga si Ryan Garcia ilabi na kay bokal kaayo kini sa iyang interes nga makigsangka sa idolo niyang si Pacquiao sa gihulagway nga 'dream fight'.
Apan diha-diha gibaraw kini ni Golden Boy Promotions President Eric Gomez, ang promoter ni Garcia, kinsa nagkanayon nga dili mahitabo ang away nilang Garcia ug Pacquiao gumikan kay wala kini sa ilang baraha. Tungod niining dagan sa mga panghitabo, adto napunting ang atensiyon sa wa'y pildeng IBF ug WBC welterweight champion Errol Spence Jr. aron maoy lagmit iparang ni Pacquiao sa usa ka three-belt unification bout. Apan human gilangkat sa WBA ang korona ni Pacquiao gumikan sa kapakyas niya pagdepensa niini, si Spence buot nang makigharong ni Yorden Ugas sa Cuba nga maoy mihulip ni Pacquiao isip WBA 147-pound 'super champion.'
Duna pa hinuo'y laing opsiyon si Pacquiao ug kini mao si WBO welterweight champion Terence Crawford, nga wala pa sa'y tatsa. Apan sa edad nga 42 ug talisaop na ang karera, daw dili mangahas si Pacquiao nga makigbinukbukay ni Crawford nga mas bata, mas gamhanan ug anaa pa sa labing hayag nga bahin sa iyang karera.
Nagnihit na gyud ang pangan sa posibleng makontra ni Pacquiao kon ugaling makahukom na kini nga mobalik og boksing. Sa akong panahom, daw dili na sab makaaway ang atong idolo karong tuiga ilabi na kay duna pa siya'y mas bug-at nga atimanon ug pangandaman sa umaabot basi sa mga hugon-hugon nga modagan siya sa mas taas nga puwesto sa kagamhanan sa sunod nga eleksiyon unya sa Mayo 2022.