CEBU, Philippines — Makabungog nga ganting salapi ang madawat sa mga mananaog sa pagsubo sa Pilipinas Vismin Super Cup nga gikatakdang sugdan karong Abril 9 sa usa ka bubble set-up ubos sa estriktong health and safety protocols.
Sa usa ka virtual meeting pinaagi sa Zoom ning bag-o lang, si Vismin Super Cup head of basketball operations Rocky Chan mipahibalo nga ang grand champion mokadawat og tunga sa milyon ka pesos, usa ka specially-crafted trophy ug libreng participation fee alang sa sunod nga conference sa liga. Ang runner-up mokadawat og P100,000.
Sa ilang unang conference, si Chan miingon nga tumong nila nga makaabot og 12 ka teams, unom sa Visayas division ug unom sab sa Mindanao.
Matag dibisyon moduwa og double round-robin sa eliminasyon diin ang top two seeds makaangkon og lingkoranan sa semifinals. Ang Team No. 3 ug No. 4 makabaton og 'twice-to-beat' incentives batok sa No. 6 ug No. 5. Ang palarang mga mananaog moduwa dayon sa knockout semifinals.
Ang division finals duwaon sa 'best-of-three' series. Ang kampiyon sa Visayas ug Mindanao division maoy magsangka alang sa Super Cup Grand Finals sa 'best-of-three' series.
Si Secretary-general in charge of basketball operations coach Chelito 'Marvin' Caro miingon nga ang torneyo modagan sud sa 25 ka adlaw diin ang Cebu maoy host sa bubble play alang sa Visayas ug Zamboanga sa Mindanao.
Sa pagka karon, pito pa ka teams ang nipadayag sa ilang partisipasyon nga mamahimong kabahin sa community-based league diin ang unang katuyoan niini mao ang pagdiskubre og mga talento ug paghatag og oportunidad ngadto sa magduduwa nga atua sa mga probinsiya.
Kini naglakip sa KCS-Mandaue ni Ricky Verdida, MJAS-Talisay, ug Lapu-Lapu City alang sa Visayas, ug Zamboanga Valientes ni Rolando 'Junnie' Navarro, Pagadian Explorers ni Mayor Samuel Co ug businessman-sportsman Rene 'Dodong' Pamaran, duha sa Zamboanga del Norte municipalities ang Sindangan ni Sonny Diaz ug President Manuel A. Roxas ni Mayor Jan Hendrick Vallecer.
Ang liga niduso sa mga dokumento ug rekisitos nga kinahanglan aron mahimong usa ka professional league ug karon nagpaabot na lang sa aksiyon gikan sa Games and Amusements Board (GAB) pinangulohan ni chairman Baham Mitra. Sa higayon nga maaprubahan, ang Super Cup mohimo og kasaysayan isip unang pro league nga magbasi sa habagatang mga probinsiya sa nasud.