CEBU, Philippines — Natapos na lang ang tuig 2020, pero ang panagribal sa Barangay Ginebra Kings ug TnT Tropang Giga nagpadayon gumikan kay ang ilang magduduwa mao man sab ang nag-unang kandidato alang sa "Best Player of the Conference" award sa PBA bubble season.
Si Stanley Pringle sa Ginebra nakigbangga nilang Ray Parks Jr. ug Roger Pogoy sa TNT alang sa kinatas-ang individual award sa bag-o lang natapos nga Philippine Cup diin ang Kings ang nakampiyon human gipilde ang Tropang Giga sa Game-5 sa ilang "best-of-seven" finals series. Gumikan kay ang 45th season gipamub-an sa usa ka conference tungod sa Covid-19 pandemic, ang liga dili na mohatag sa tradisyonal nga MVP award, hinuon ang BPC award ang itunol ngadto sa magduduwa. Ang PBA Awards Night nga temporaryong ipuli sa naandan nga Leo Awards gikatakda sa Enero 17 sa virtual nga paagi.
Si Parks nag-una sa statistical race, apan mikanaog kini human makaangkon og calf injury sa title series opener. Si Pogoy ikalima sa players' stats, gisundan ni Pringle sa ikaunom maskin siya ang main man sa Kings sa tibuok conference. Si Pringle ang nangu sa team scoring gikan sa eliminations hangtod sa semifinals uban ang average nga 18.5 points, 5.9 rebounds ug 3.9 assists.
Gipakayab niya ang iyang duwa ngadto sa finals diin mihimo siya og team-high 19.6 points, 4.6 rebounds, ug 4.8 assists aron hatagan ang prangkisa sa labing unang All-Filipino championship sa milabay'ng 13 ka tuig.
Lain pang magtakus alang sa labing taas nga dungog mao silang Matthew Wright ug Calvin Abueva sa Phoenix uban ni CJ Perez sa Terrafirma. Si Abueva mitapos sa ikaduha sunod ni Paras sa statistical points, gisundan nilang Perez ug Wright.