CEBU, Philippines — Ang wa'y pildeng WBO welterweight champion nga si Terence "Bud" Crawford (36-0, 27KOs) gikatakda pang modepensa sa iyang titulo batok ni British challenger Kell Brook (39-2, 27KOs) sunod semana, apan si Top Rank promoter Bob Arum duna na'y giluto daan alang ni Crawford sunod tuig.
Segun sa taho ni Wil Esco sa Bad Left Hook, si Arum plano nga iparang si Crawford batok ni eight-division world champion Manny Pacquiao o dili ba ni WBC/IBF welterweight titlist Errol Spence Jr. sa tuig 2021.
“The next fight is going to be, as far as I can control things, we’re not going to fool around, it’s going to be Pacquiao or Spence,” matud pa ni Arum nga maoy promoter ni Crawford.
Sa susamang balita, si Arum nangangkon nga duna na unta siya'y nahulma nga kasabotan alang sa sangka nilang Crawford ug Pacquiao nga mahitabo didto sa Qatar, apan ang mga lokal nga opiyales mibakwi sa ilang suporta gumikan sa pag-ulbo sa pandemiya.
Kon mabalik na sa maayong sitwasyon, si Arum miingon nga gusto niyang lab-ason og balik ang maong kasabotan gumikan kay ang panag-abot nilang Crawford ug Pacquiao ibabaw sa ring nag-una man sa iyang hunahuna.
Aron matuman ang plano ni Arum, kinahanglan nga dispatsahon una ni Crawford si Brook sa ilang binukbukay karong Nobiyembre 15 (oras dinhi sa Pilipinas) didto sa MGM Grand bubble sa Las Vegas, Nevada.