CEBU, Philippines — Gitay-og ni Canelo Alvarez ang kalibotan sa boksing human ang Mehikanong world middleweight champion mipahibawo nga nakigbuwag siya sa Golden Boy Promotions ug nga usa na siya karon ka free agent.
Si Canelo mipirma og 11 ka away nga kontrata nga mibalor og $365 million uban sa DAZN sukad niadtong Oktubre 2018 ug duna sab siya'y kasabotan sa Golden Boy, apan nakaaway lamang tulo ka higayon niadtong mga panahona. Ang four-division world champion dugay nang mipasaka og kaso batok sa Golden Boy Promotions, sa presidente niining si Oscar de Hoya ug sa DAZN didto sa Amerika diin siya nangayo og $280 nga danyos gumikan kay wala pa siya makabalik sa ring ug makapadayon sa iyang karera. Segun sa nanggawas nga mga balita, ang Golden Boy Promotions ug Team Canelo nagkabangi sud sa pipila na ka mga bulan. Tungod niini, nagusbat ang maayo nilang relasyon ug gamay na lang kaayo ang tsansa nga mahilot pa kini. Ang manedyer ni Canelo nga si Eddy Reynoso mikompirmar sa publiko nga si Alvarez usa na karon ka free agent ug nangandam sa sunod niyang away nga lagmit mahitabo karong Disyembre 19 o sa dili pa matapos ang tuig.