CEBU, Philippines — Bisan og nagtan-aw lamang ang lider nilang si Jayson Castro sa ilang bench gumikan kay dunay injury, mangtas gihapon kaayo ang TNT Tropang Giga sud sa PBA bubble.
Nakakuha na sab og maayong salida gikan nilang RR Pogoy, Troy Rosario, Bobby Ray Parks, Simon Enciso ug Poy Erram, ang Tropang Giga milampurnas sa Blackwater Elite, 109-66 aron pagpabiling wa'y pilde sa PBA Philippine Cup didto sa AUF Sports Arena sa Angeles City, Pampanga niadtong Huwebes sa gabii.
Ang Sugboanong si RR Pogoy mikadlit og 20 puntos, pito ka rebounds, upat ka assists ug tulo ka steals aron pangulohan ang Tropang Giga nga miinat sa perpekto nilang rekord ngadto sa 5-0.
Dako sab og natabang sila si Parks, Rosario, Enciso ug Erram nga mitali og 14 puntos matag usa alang sa Tropang Giga. Ang kanhi player sa TNT nga si Don Trollano mipupo og 23 puntos alang sa Blackwater nga nakatilaw sa ikaduha nilang sunod-sunod nga pilde ug ikatulo sa kinatibuk-an sud sa lima ka duwa.
Sa laing aksiyon, si Vic Manuel mipupo og 10 sa iyang 18 puntos sa katapusang kuwarter aron agakon ang Alaska Aces ngadto sa ligas nga kadaogan batok sa Rain or Shine Elasto Painters, 89-88.
Mao kadto ang ikatulong sunod-sunod nga daog sa Aces human sila masagunsoni og duha ka pilde, samtang ang E-Painters naparot sa labing unang higayon gikan sa ilang 4-0 nga sinugdanan.