CEBU, Philippines — Miabot ngadto sa 16 ka NBA players ang nagpositibo sa Covid-19 human sa 302 ka mga tests nga gipahigayon niadtong Miyerkules.
Mao kini ang gipahibalo sa liga ug sa players union niini kagahapon.
Wala hinuon gibutyag ang pangan sa mga players o teams sa NBA sa mubo kaayo niining pamahayag.
Ang testing gihingusgan sa NBA tipik sa plano niining pagsugod og balik sa ilang mga duwa karong Hulyo 31 oras dinhi sa Pilipinas didto sa Walt Disney World Resort sports complex sa Orlando, Florida.
Ang liga nasuspenso niadtong Marso 11 human nagpositibo sa Covid-19 si Utah Jazz big man Rudy Gobert.
Kadtong mga players nga nagpositibo pabilin nga magkwarantin hangtod nga mahatagan na sila og clearance sa usa ka doktor nga hingpit na silang naayo sa maong sakit.
Human niini, sila maoy modesisyon kon moduwa pa ba sila o dili sa pagtiwas sa naputol nga 2019-2020 NBA season.
Sila si Indiana Pacers point guard Malcolm Brogdon ug Sacramento Kings forward Jabari Parker mipahibalo ning semanaha nga nataptan sila sa bagsik nga virus, apan gusto nilang moduwa sa nahibiling bahin sa season.