CEBU, Philippines — Gibansagan siya og 'Magic' ibabaw sa ring.
Tuod man, mao kini ang gibuhat ni Mike Plania kagahapon didto sa MGM Grand sa Las Vegas.
Gitumba ni Plania si Joshua 'Don't Blink' Greer Jr. duha ka higayon aron pagpukan sa mas inilog nga WBO No.1 bantamweight contender pinaagi sa majority decision sa main event sa "Boxing is Back' series sa Top Rank sud sa "The Bubble" didto sa MGM Grand.
"This win is going to change my life," matud pa ni Plania. “I thought I could knock him out after the knockdown in the first round, but he was tough and adjusted his strategy.
“I took this fight on only three weeks’ notice, but I had faith in God that I could win,” dugang pa sa garbo sa Sanman Promotions nga atua magbasi sa General Santos City.
Biya kaayo si Plania sa wala pa ang away, apan iyang nakuha ang gikinahanglan niyang kompiyansa human nakalandig siya og makusog nga left hook nga nakapatukay-ang ni Greer sa sayong bahin sa unang higayon. Gamit gihapon ang maong hait nga suntok, gipalukapa ni Plania si Greer sa ikadunang higayon sa naghinapos nga bahin sa ikaunom nga hugna.
Apan sama sa una niyang paghagba, dali nga nakabarog si Greer ug daw wala masakiti. Sugod sa ikapitong hugna, maora'g nawad-an na og bala si Plania, apan madasigon kining nakigkumbati ni Greer hangtod sa nahibiling bahin sa aksiyon. Human sa away, naangkon ni Plania ang duha sa tulo ka mga hurado.
Samtang surprisa kaayong miiskor og tabla si judge Dave Moretti, 94-94, si Tim Cheatham miiskor og 96-92, samtang si Patricia Morse mihatag og 97-91 parehong pabor ni Plania hinungdan sa majority decision.
Si Plania nagbitbit na karon og 24-1 record uban ang 12KOs, samtang si Greer, kansang 19 ka sagunson nga daog nga milanat og lima ka tuig naputol, natagak ngadto sa 22-2-1 (12KOs).