CEBU, Philippines — Busy kaayo si ALA Gym chief trainer ug manager Edito Villamor ning panahona.
Apan dili sa pag-train og mga boxers kondili pagtabang sa iyang asawa nga si Gina pagpadagan sa ilang mini-grocery store didto sa Barangay Pagsabungan, Dakbayan sa Mandaue.
"Kuyog mi pirme ni misis kay tabang ko sa iyang negosyo unya taas sab kaayo ang among bonding sa pamilya," matud pa ni Villamor.
Taliwala ning panghitabo, si Villamor miangkon nga naguol siya kay daw sa nawad-an og gana sa training ang ilang mga boxers labi na kay wala pa'y nasayod kon kanus-a mabalik sa normal ang tanan.
Sa pagka karon, tulo na lang ka buok boxers ang nahabilin sa ilang gym nga mao sila si Melvin Jerusalem, Milan Melindo ug Jonas Sultan.
"Ang uban boxers namo nanguli gyud sila kay wala pa'y kasiguroan kon kanus-a mahuman ang krisis," dugang pa niya.
Sa iyang bahin, si Villamor nagkanayon nga wala siya magkuwang paghatag og tambag sa ilang mga boksidor kon unsa angayan nilang buhaton ning panahona.
"Ang gi-advice namo nila nga dili gyud magpadako sa timbang kay mao gyud na ang makapawala sa kondisyon," sumala pa ni Villamor. "Ug dili lang sila mawagtangan sa ilang paglaum. Kinahanglan nga magkugi lang gyud sila sa praktis bisan pa sa mga panghitabo karon.
Ang 49-anyos nga si Villamor usa sa labing hait nga boksidor nga nahulma sa ALA Gym. Miretiro siya human ma-knockout sa Mehikanong si Ricardo 'Finito' Lopez sa ilang WBC minimumweight title bout niadtong Marso 16, 1996 didto sa MGM Grand sa Las Vegas.
Sa 32 ka away, nagbawon siya og 29-2-1 record uban ang 26KOs.
Wala man tuod niya makab-ot ang iyang damgo nga ma-world champion isip boksidor, apan iya kining nakab-ot isip trainer.
Si Villamor maoy responsabli paghashas sa abilidad sa duha ka world champions sa ALA Gym nga sila si Milan 'El Metodico' Melindo (WBO minimumweight) ug Merlito 'Tiger' Sabillo (WBO light flyweight).
Kabahin sab siya sa training team ni four-division world champion Donnie 'Ahas' Nietes.