CEBU, Philippines — Mitug-an si four-time heavyweight boxing champion Evander Holyfield nga mobalik siya og away sa edad nga 57-anyos.
Mipasabot si Holyfield nga iyang kining pagabuhaton alang sa maayong kawsa gumikan kay gusto niyang tabangan ang mga first responders ug mga bata nga batukan ang coronavirus pandemic.
Midugang si Holyfield nga buot niyang moaway og mga exhibition bouts aron makatigum og pundo alang sa Unite4OurFight nga misuporta sa pagtuon ug mga proyekto alang niadtong mga bata, kansang pangtungha nahunong tungod sa coronavirus.
Ang pamahayag ni Holyfield lagmit magtukmod kaniya ngadto sa ikatulong away batok sa karibal niyang si Mike Tyson nga sa edad nga 53 anyos nagplano sab nga moaway og balik sa susamang kawsa.
Sa una nilang engkuwentro niadtong 1996, gipakamang ni Holyfield si Tyson sa ika-11 nga hugna aron sakmiton ang WBA title. Sa ilang rematch pagka sunod tuig, midaog siya sa dihang na-disqualify si Tyson gumikan sa pagpaak niini sa dunggan ni Holyfield.