CEBU, Philippines — Human sa dugay panahon nga pagkalangay, gikanselar na gyud sa Department of Education (DepEd) ang Palarong Pambansa ning tuig gumikan sa coronavirus pandemic.
“We are cancelling our usual activity that is so much fun and exciting that the whole country is participating,” matud pa ni DepEd Secretary Leonor Briones segun sa taho sa The Philippine STAR, igsuong mantalaan sa Banat News.
Dili na hinuon ikatingala ang maong desisyon gumikan kay ang Marikina City una nang misibog pag-host sa tinuig nga torneyo alang sa mga atleta sa elementarya ug sekondarya sa nasud.
Gawas niini, ang Philippine Sports Commission (PSC) misira na sa tanan niining mga kalihukan sa paugnat sa kusog ning tuiga.
Panahon lamang ang gipaabot aron ang DepEd mopakanaog og desisyon kabahin ning maong matang ug nahitabo na gyud kini sa miaging adlaw. Katapusang nakanselar ang Palaro niadtong 2004 gumikan sa nasudnong eleksiyon.