CEBU, Philippines — Nakadawat og laing major award ang pambatong forward sa NorthPort nga si Sean Anthony human siya gibayaw nga 'Defensive Player of the Year' sa PBA Press Corps. Atol sa Leo Awards nga maoy miabli sa PBA Season 45 niadtong Marso 8, si Anthony nasud sa Mythical Five First Team selection sa labing unang higayon ug naapil sab sa All-Defensive team.
Ang 34-anyos nga si Anthony gikatakda unta nga modawat sa maong pasidungog sa ika-26 nga edisyon sa PBA Press Corps Awards Night sa miaging bulan, apan gisibog ngadto sa laing petsa nga wala pa hisaryi gumikan sa coronavirus pandemic.
Si Anthony nakigduyog nilang Chris Ross, June Mar Fajardo, Marc Pingris, Chris Jackson, Freddie Abuda, Gabe Norwood ug Poy Erram sa listahan sa labing maayong modepensa nga mga basketbolista sa kasaysayan sa liga.
Gawas ni Anthony, mga sayong ginganlan aron makadawat og award mao sila si Terrence Romeo (Quality Minutes), CJ Perez (scoring champion), June Mar Fajardo (Order of Merit) ug Game of the Season (NorthPort vs. NLEX).
Pasidunggan sab ang All-Rookie team (Perez, Robert Bolick, Javee Mocon, Bobby Ray Parks ug Abu Tratter), All Interview team (Kiefer Ravena, Christian Standhardinger, Beau Belga, Vic Manuel, Arwind Santos ug coach Yeng Guiao) ug ang mga D-League Finals MVP nga sila si Thirdy Ravena (Aspirants Cup) ug Hesed Gabo (Foundation Cup).
Gikatakda pang i-anunsiyo ang President's Award, Danny Floro Executive of the Year ug ang Virgilio 'Baby' Dalupan Coach of the Year.