CEBU, Philippines — Si WBO bantamweight champion John Riel 'Cuardo Alas' Casimero magpabilin sa Las Vegas hangtod nga duna na'y desisyon kabahin sa bag-ong petsa sa iyang away.
Mao kini ang gipahibalo ni MP Promotions head Sean Gibbons nga gikatakdang makighimamat ni Casimero sud ning semana.
"We're hoping for the best," matud pa ni Gibbons nga milarga sa Las Vegas sa miaging adlaw.
Si Casimero uban ang iyang trainer nga si Nonoy Neri naabot sa Las Vegas niadtong Lunes pa lamang alang unta sa katapusang hunat sa iyang training sa unification bout nila ni WBA/IBF bantamweight champion Naoya 'Monster' Inoue nga gikatakda sa Abril 25 didto sa Mandalay Bay sa Las Vegas.
Apan tungod sa COVID-19 pandemic, si Top Rank chairman Bob Arum napugos pagsibog sa maong sangka nga giatngan sa mga boxing fans.
Nasayangan man tuod niini si Casimero kay andam na unta kaayo siyang makigsinukmagay ni Inoue, apan iyang gisuportaan ang maong lakang kay alang man kini sa kaluwasan ug kaayohan sa kinabag-an.