CEBU, Philippines – Gikompirmar na ni Alaska Aces veteran center Sonny Thoss nga moretiro na siya ug ang All-Filipino Cup nga sugdan sa Marso maoy katapusan niyang pagpakita og aksiyon sa PBA.
Ang 38-anyos nga si Thoss nagkanayon nga biyaan na niya ang liga tungod kay nakita niya nga nabuhat na niya ang gusto niya sa iyang karera ug gusto niya hatagan og kahigayonan ang mga batan-ong players sa Alaska nga mohimo sa kaugalingon nilang pangalan.
Si Thoss usa ka Fil-German diin iyang inahan usa ka Cebuana.
Si Thoss nakuha sa first round sa 2004 draft sa Alaska ug wala na gyud kini buhii.
Bugti sa gipakita nga dedikasyon ni Thoss sa Alaska, ang koponan mo-retiro sa iyang No. 7 jersey sa usa ka simpleng seremonyas atol sa opening sa All-Filipino Cup.
Si Thoss mitabang sa Alaska nga modaog og tulo ka championship ug siya usab ang Finals MVP niadtong 2013 sa Commissioner's Cup.
Si Thoss usa ka 12-time All-Star ug two-time Mythical first team. Midaog usab siya og silver medal uban sa Gilas Pilipinas sa FIBA Asia Championship didto sa China niadtong 2015.