CEBU, Philippines — Subling gipahimangnoan ni undefeated Terrence Crawford ang welterweight division nga siya ang hari sa dibisyon human sa iyang ninth round TKO nga kadaugan batok sa challenger nga si Egidijus Kavaliauskas kagahapon didto sa New York.
Si Crawford kinsa ang pound-for-pound best nakadepensa sa iyang WBO welterweight belt ug siya gihapon ang gitan-aw nga labing gikahadlokan sa tanang kampiyon sa 147 lbs.
Si Crawford, kinsa misaka sa record nga 36-0, 27KOs, dugay na nga nanawag og unification bout batok sa ubang kampiyon sa iyang dibisyon, apan pakyas siya pagkuha og dakong sangka. Sa iyang dominanteng kadaugan batok ni Kavaliauskas, nanghinaot siya nga muduol na ang dakong kaaway sa sunod tuig.
“I am not ducking anybody. Listen man, everybody knows who I want to fight. I don’t have to name names.
I want all the top guys,” matud pa niya sa Agence France Presse.
Una ng gidungog nga nindot iparang ni Crawford mao ang IBF ug WBC champion nga si Errol Spence, apan miangkon si Top Rank Inc. promoter Bob Arum nga madugay pa aron mahinayon kini human nalambigit si Spence sa kaso nga ‘drunk driving’.
Dugay na usab nga giatangan kung mahitabo ba ang sangka tali ni Crawford ug Pinoy ring icon Manny Pacquiao, apan ang duha ka kampo pulos wala mipakita og interes.