CEBU, Philippines — Ang Sugboanong si Greg Slaughter maoy gipili ni coach Tim Cone nga mokompleto sa Final 12 sa Gilas Pilipinas nga moduwa sa 30th Southeast Asian Games basketball event nga sugdan karong alas-8 sa gabii.
Ang kampanya sa Gilas sugdan sa ilang sangka batok Singapore.
Si Slaughter mitapak sa gibakantihang puwesto ni Roger Pogoy, kinsa nakaangkon og injury. Usa sa tulo si Slaughter nga gipilian ni Cone uban sila si Scottie Thompson ug Art Dela Cruz. Gikuha ni Cone si Slaughter tungod kay makadugang kini sa gidak-on sa Gilas ug kinahanglan nila ang depensa.
Uban ni Slaughter nga mosuway paghatag sa ika-19 nga sunod-sunod nga gold medal sa basketball alang sa nasud mao iyang teammates sa Barangay Ginebra nga sila si LA Tenorio, Japeth Aguilar ug Stanley Pringle.
Anaa usab si JuneMar Fajardo, Marcio Lassiter ug Chris Ross sa San Miguel Beermen. Mokumpleto sa line-up sila si Troy Rosario sa TNT KaTropa, Vic Manuel sa Alaska Aces, Kiefer Ravena sa NLEX Road Warriors, Matthew Wright sa Phoenix Fuel Masters ug Christian Standhardinger sa Northport Batang Pier.