CEBU, Philippines — Gipakita ni gymnast Carlos Edriel Yulo nga angayan siyang tawgon nga 'Golden Boy' sa Philippine team human midaog sa ikaduha niyang bulawan sa 30th Southeast Asian Games didto sa Rizal Memorial Coliseum kagahapon.
Human maghari sa artistic gymnastics all-around niadtong Domingo, si Yulo mipabilib na usab sa Pinoy fans dihang nanghawod siya sa floor exercise event sa artistic gymnastics.
Mirehistro si Yulo og 14.700 points ug gipilde niya ang ang Thai nga si Surintornta Tikumporn nga adunay 13.833 points.
Dili lang si Yulo ang mitunol og gold medals sa Pilipinas kagahapon kay ang mga arnisadors nga sila si Crisamuel Delfin ug Mary Allin Aldeguer ug ang wushu sensation nga si Agatha Wong mihakot og bulawang medalya alang sa Philippine team sa 30th Southeast Asian Games kagahapon.
Sila si Delfin ug Aldeguer maoy mitapos sa kampanya sa Phl arnis team bitbit ang bulawan sa tagsa-tagsa nila ka dibisyon sa non-traditional open weapon exhibition.
Samtang sila si Delfin ug Aldeguer midugang sa 14 ka gold medals nga natampo sa mga arnisadors sa nasud.