CEBU, Philippines — Sa wala damha, ang veteran import ug kanhi NBA cager nga si Renaldo Balkman nakahukom nga mobiya sa Alab Pilipinas.
Ang kanhi PBA best import nga si Balkman nangayo og pasaylo sa Alab management tungod sa iyang pagbiya ug pag-uli sa Estados Unidos tungod sa personal nga rason.
Dakong pagsuway kini sa Alab ni coach Jimmy Alapag tungod kay si Balkman maoy iyang leading scorer ug rebounder ug mao unta ang usa sa iyang mga gisaligan alang sa ilang kampanya alang sa ABL title.
"It's not easy to lose a player the caliber of Balkman," matud pa ni Alapag sa Spin.ph.
Ang 6-foot-8 nga si Balkman maoy reigning Defensive Player of the Year sa ABL. Mi-average siya og 25.0 points ug 10.5 rebounds sa Alab sa miaging season.
Si Balkman mao unta ang ikatulong import sa Alab alang sa sunod season uban nila ni Adrian Forbes ug Khalif Wyatt.
Dali hinuon nakakita og hulip ang Alab ni Balkman human nila gikuha ang serbisyo ni Nick King nga nakaduwa na sa NBA G-League.