CEBU, Philippines — Giisip ni three-time NBA champion LeBron James ang kanhi All-Star ug iyang teammate nga si Dwight Howard nga usa sa mga lig-ong hinagiban sa Los Angeles Lakers.
Ang Lakers kasamtangang nag-una sa Western Conference uban ang 6-1 nga baraha. Kini tungod sa gipakitang kadominante sa tandem nilang James ug Anthony Davis.
Hinuon, si James nagkanayon nga dako og natampo ang 6-foot-11 nga si Howard sa sunod-sunod nilang kadaogan tungod sa gipakitang kakugi niini sa depensa ug rebounding.
Si Howard miduwa gikan sa bench isip back-up ni starting center JaVale McGee, apan nag-average kini og 8.9 points, 9.5 rebounds ug 1.3 blocks matag duwa.
Nasayran, nga si Howard mao ang katapusang player nga gikuha sa Lakers atol sa off-season human na-injured ang star nga si DeMarcus Cousins.
Dugang pa ni James, nga nalipay siya sa iyang koponan tungod kay balanse ang opensa niini, samtang si Howard mao ang kanunay mangulo sa ilang depensa.
Ang Lakers laraw nga moinat sa ilang winning streak ngadto sa pito sa ilang pakigsangka sa Miami Heat karong Sabado.