CEBU, Philippines — Ang University of Southern Philippines Foundation (USPF) mibangon human nahagba sa unang set aron patikangkangon ang University of San Jose-Recoletos (USJ-R) sud sa upat ka sets 17-25, 25-21, 25-14, 25-12 sa tagakay nga duwa sa ilang best-of-three finals aron silyohan ang talagsaong grandslam sa secondary girls volleyball event sa 19th Cebu Schools Athletic Federation, Inc. (CESAFI) season niadtong Lunes sa gabii didto sa Aznar Coliseum.
Susama nga dalan ang naagian sa USPF sa wala pa angkona ang unang set, 22-25, 25-23, 25-21, 25-14.
Nakatusik pa hinuon ang USJ-R, 28-26, 23-25, 25-18, 25-17 hinungdan nga nakapuwersa kini og knockout Game-3.
"Kumpyansa kaayo pag Game 2. Lahi kaayo ilang duwa. Dili mao ang among gipraktisan," hinumdum pa ni USPF coach Yolanda Rizarri.
Imbes mangasaba, gipahinumduman na lang ni Rizarri ang iyang mga batos sa ilang misyon nga makakab-ot og three-peat.
Tuod man, ang ilang kaparotan sa Game-2 nakapadasig hinuon kanila og maayo.
Nasugamak man tuod sila sa unang set, apan ang USPF mangtas kaayo aron pakamangon ang USJ-R sa sunod nga tulo ka sets.
Bangis kaayo ang USPF sa ikaupat nga set gumikan kay ila dayong gikulata ang USJ-R gikan sa pagsugod dayon na ngadto sa pagposte og 11-1 nga bentaha ubos sa liderato ni Mitzi Panangin nga maoy gikoronahang MVP.
Gisuwayan pa sa USJ-R nga magpabiling buhi human si Villa Anne Perales naka-serve sud sa lima ka higayon, apan wala na kapugni pa ang USPF nga modimdim sa bulawanong kalamposan.
Ang gamhanang spike ni Lyn Ross Densing maoy nagtuldok sa talagsaong dungog nga nakuha sa USPF.
Gawas sa MVP award, si Panangin mao sab ang gibayaw nga first middle blocker, samtang ang iyang mga teammates nga sila si Gloria Mates, Tracy Cortes ug Vanessa Miñoza maoy best libero, best opposite spiker ug best setter.
Nagkumpleto sa line-up sa USPF champion team mao sila si Tes Gloria, Mary Anthoneth Cortes, Heddy Thea Alipio, Dya Hanica Mejos, Liane Minoza, Ressel Pedroza, Moncha Mae Pacinio, Khylem Harl Progella, Monifah Nielsen Pal-ing, ug Alexandra Adolfo.
Sa laing bahin, ang uban pang mga individual awardee mao sila si Cherie Tagaod (second middle blocker) ug Louneth Marie Abangan (second best outside spiker) sa USJ-R ug Jennifer Louise De Los Santos (first best outside spiker) sa SHS-AdC.