CEBU, Philippines — Aron maseguro nga mabawi ang kampiyonato sa ABL, ang Alab Pilipinas ni coach Jimmy Alapag mikuha sa serbisyo sa tulo ka import alang sa pagbukas sa 2019-20 season sunod buwan.
Gawas sa kanhi NBA ug veteran nga si Renaldo Balkman, gikuha usab sa Alab isip reinforcement si Adrian Forbes ug Khalif Wyatt. Si Forbes usa ka kanhi US NCAA standout, samtang si Wyatt taas usab og kasinatian isip import diin nakduwa siya sa NBA D-League ug sa China.
Si Alapag migamit lang og duha ka imports sa miaging season diin miduwa si Balkman uban ang higante nga si PJ Ramos, apan pakyas sila dihang wa damha nga gitaktak sila sa Hong Kong Eastern Lions sa quarterfinals.
Gawas sa tulo ka import, saligan ni Alapag ang mga locals nga sila si Fil-American Jason Brickman, Lawrence Domingo ug Aron Aban.