CEBU, Philippines — Pakyas ang apo ni Philippine boxing legend Gabriel 'Flash' Elorde nga si Juan Miguel Elorde pagsakmit sa WBO junior featherweight title human siya gipaundang sa third round ni Mexican ug defending champ Emanuel Navarrete atol sa ilang sangka kagahapon didto sa Las Vegas.
Misukol si Elorde og sinukliay ni Navarrete nga maoy nakita sa iyang kampo nga dakong sayup ilabi na nga migawas nga mas dako ug kusug ang Mehikano.
Kusug si Elorde sa pagsugod sa sangka diin mipatama siya og mga kusug nga jab ug hook ngadto sa Mehikano, apan bangis nga mibawus si Navarrete kinsa kapila mipabarag sa Pinoy boxer sa wala pa hingpit nga mipayaka niya sa third round.
Wala hinuon mipakita si Elorde nga nasakitan siya, apan napugos si referee Russell Mora sa pagundang sa sangka tungod usab kay nakita niya nga nagkadugo na ang Pinoy boxer ug galisud na kini paglihay sa kumo sa kontra tungod sa kalipong.
Si Navarrete mipasaka sa iyang rekord ngadto sa 29-1, 25KOs, samtang si Elorde nakatilaw sa iyang ikaduhang pilde sa 30 ka sangka.