CEBU, Philippines — Gidemolis sa Mohon, Dumlog ug Lawaan 3 ang ilang mga kontra sa 2019 Talisay City Mayor's Cup Inter-Barangay Basketball Tournament didto sa Talisay City Sports Complex.
Sa juniors division, si Keaton Taburnal mipabuhagay og 26 puntos sa dihang gilampurnas sa Mohon ang Poblacion, 103-72, samtang sila si Zaldy Estimada, Jhocel Arizo ug Wil Echavez nagkumboya'g 35 puntos aron pangulohan ang Dumlog ngadto sa 93-61 nga demolisyon sa Manipis.
Dako sab og natampo sila si Mike Mandal, Heart Bonggo, Joma Fernandez ug Kenta Saban nga nagkumbinar og 51 puntos alang sa Mohon nga nagsandig sa 30-16 rally sa ikaduhang kuwarter ug ingon man sa 30-17 nga bomba sa fourth period aron ilubong ang Poblacion.
Sama sa Mohon, dominante sab kaayo ang Dumlog nga wala na molingi pa sukad miposte og 50-36 nga labaw sa halftime.
Sa seniors category, sila si Charjeryjun Paraiso, Denzel Sabraso ug Gadiano Gomercindo nakatigum og 36 puntos sa Lawaan 3 nga mipakaging saTapul, 85-66.
Sa laing duwa sa seniors, si Jerson Briones mipabuto og 36 puntos aron ituboy ang Pooc ngadto sa 76-69 nga kadaogan batok sa Maghaway.