CEBU, Philippines – Nunot sa kasaulogan sa ika-25 nga anibersaryo sa Banat News karong adlawa, Agosto 23, ang sports section ning nag-unang mantalaan Bisaya, motagik og 25 ka tinagsip apan dagko nga mga balita dinhi sa kapupud-an ug sa tibuok kalibotan agi'g paglab-as sa mga balita gikan sa Agosto sa miaging tuig hangtod karon.
1. Fajardo mihimo og kasaysayan
Mihimo og rekord nga lisud tupngan ang Cebuano superstar nga si JuneMar Fajardo human niya madaog ang ikapito niyang "Best Player of the Conference" award sa PBA Commissioner's Cup niadtong Agosto 3, 2018.
2. Hidilyn naka-gold sa ASIAN games
Natuman ang pangandoy ni Olympian Hidilyn Diaz nga mohatag og bulawang medalya sa Pilipinas human niya gidominar angwomen's 53 kgs. division sa weightlifting event sa 18th Asian Games niadtong Agosto 21 didto sa Indonesia.
3. Didal mikabkab sab og bulawan
Ang garbo sa Sugbo ug skateboard sensation nga si Margielyn Arda Didal mitunol sa Pilipinas sa ikaupat niining bulawang medalya sa 18th Asian Games.
4. UV Green Lancers grandslam na sab
Nakab-ot sa University of the Visayas (UV) Green Lancers ang gihandom nilang 'grandslam sa 18th Cebu Schools Athletic Foundation, Inc. (CESAFI) human ilang gipilde ang University of San Jose-Recoletos (USJ-R) Jaguars.
5. UC pabiling hari sa Malaysia Table Netfest
Ang University of Cebu (UC) table netters nakadepensa sa ilang trono pinaagi sa pagpilde sa University of Sri Lanka Jayewardenepura sa 13th Universiti Teknologi Mara (UiTM) International Sports Fiesta didto sa Malaysia. 6. PACQUIAO BAGSIK GIHAPON
Gipamatud-an ni Manny Pacquiao nga aduna pa siya'g igong kusog dihang midaog kini pinaagi sa split decision batok ni Keith Thurman aron sakmiton ang WBA unified welterweight title niadtong Hulyo 21 didto sa Las Vegas, Nevada.
7. Manu Ginobili miretiro na
Ang San Antonio Spurs star nga si Manu Ginobili miretiro na sa basketbol nga maoy nagtak-op sa mabulukon niyang 23 ka tuig nga karera sa NBA.
8. Raptors midaog sa labing unang title
Gipalayas sa Toronto Raptors ang Golden State Warriors sa ilang trono sa Game-6 sa ilang 'best-of-seven' finals series aron sakmiton ang labing una nilang korona sa NBA niadtong Hunyo 14 didto sa Oracle Arena sa Oakland, California.
9. Kawhi NBA finals MVP na sab
Si Kawhi Leonard gibayaw nga NBA Finals MVP sa ikaduhang higayon human niya hatagi ang Toronto Raptors sa labing unang kampiyonato sa NBA sud sa 24 ka tuig sa kasaysayan sa prangkisa.
10. NBA SUPERSTARS NANGLAYAS
Nakamugna og kasikas ang nahitabong free-agency diin daghang NBA superstars ang mibalhin sa laing mga koponan.
11. Leonard, George mipirma na'g kontrata
Sila si Kawhi Leonard ug Paul George opisyal na nga mga sakop sa Los Angeles Clippers human mipirma og kontrata uban sa koponan.
12. Durant, Irving opisyal nang sakop sa Nets
Ang duha ka NBA superstars nga sila si Kevin Durant ug Kyrie Irving mipirma na sab og kontrata uban sa Brooklyn Nets niadtong Hulyo 7.
13. Livingston gibuhian sa Warriors
Mawad-an na sab og laing beterano ang Golden State Warriors dihang wala nila lugwayi pa ang kontrata sa point guard niining si Shaun Livingston.
14. Westbrook usa na ka Rockets
Opisyal na nga usa ka Houston Rockets si kanhi MVP Russell Westbrook human siya mipirma og kontrata niadtong Agosto 16.
15. Cebu ni-host world dancesport tilt
Ang Sugbo mi-host og usa ka international dancesports competition nga giulohan og 'World DanceSport Federation (WDSF) Cebu Open 2018" ug 10th Dancesport Sa Sugbu' niadtong Septiyembre 8 sa miaging tuig diha sa Pacific grand ballroom sa Watefront Cebu City Hotel and Casino.
16. Gilas sud quaterfinals sa ASIAN games
Ang Gilas Pilipinas ubos sa giya sa bag-o nilang coach nga si Yeng Guiao milansang og tulo ka sunod-sunod nga daog aron moabante sa quarterfinals sa Asian Games niadtong miaging tuig.
17. Ginebra kampiyon sa 2018 PBA Commissioner's Cup
Ang crowd-darling Barangay Ginebra nakampiyon og balik dihang gipilde nila ang ilang igsuong koponan San Miguel Beermen sa finals sa PBA Commissioner's Cup niadtong Agosto 8, 2018.
18. Donaire gikoronahan isip WBA champion
Si Nonito 'The Filipino Flash' Donaire Jr. gikoronahan isip WBA bantamweight champion human niya pildiha pinaagi sa TKO si Ryan Burnett niadtong Nobiyembre 3 didto sa United Kingdom.
19. Magnolia hari sa
PBA GOVERNO'S CUP Ang Magnolia Hotshots mipukan sa Alaska Aces aron ilhong kampiyon sa PBA Governor's Cup.
20. Nietes kabahin na
SA KASAYSAYAN Ang longest reigning Pinoy world champion nga si Donnie 'Ahas' Nietes nahimong kabahin sa kasaysayan dihang nahimo siyang four-division world champion human sa iyang unanimous decision nga kadaogan batok sa Hapon nga si Kazuto Ioka sa ilang WBO junior bantamweight title didto sa China.
21. Didal mihimo'g kasikas sa L.A.
Mihimo na sab og kasikas ang Sugboanang skateboard sensation nga si Margielyn Didal sa langyaw'ng lapyahan human siya nalandig sa ikalimang dapit sa LA leg sa Street League Skateboarding (SLS) World Tour niadtong Hulyo 29 didto sa Galen Center sa Los Angeles, California.
22. Cebu Pink paddlers misidlak sa Hong Kong
Ang Cebu Pink Paddlers mipahiluna sa ikatulong dapit sa Stanley International Friendship Dragon Boat Races 2019 niadtong Hunyo didto sa Hong Kong.
23. Cebuana gymnast mihakot medalya sa Singapore
Ang Cebuana gymnast nga si Daniella Reggie Dela Pisa mihakot og mga medalya kortesiya sa clubs ug ribbons event sa Singapore Open Gymnastics Championship didto sa Singapore.
24. Players, coaches gisilotan
Ang Cebu Schools Athletic Foundation, Inc. (CESAFI) pinaagi sa Commissioner's Office misuspenso sa duha ka players sa University of Southern Philippines Foundation Baby Panthers ug University of Cebu Junior Webmasters ug ingon man ang mga assistant coaches sa duha ka teams gumikan sa ilang pag-apil-apil sa kagubot atol sa duwa tali sa UC ug USPF niadtong Hunyo 20 diha sa USC gym.
25. SWU, USJ-R kampiyon sa Partner's Cup
Ang SWU-Phinma Cobras misilhig sa ARQ Builders-UV Green Lancers aron langkaton ang labing una nilang kampiyonato sa CESAFI Partner's Cup niadtong Agosto 4. Samtang ang USJ-R Baby Jaguars mao sab ang kampiyon sa juniors division human gipilde ang SHS-AdC Magis Eagles. Lemuel P. Maglinte