CEBU, Philippines – Masentro sa atensiyon sa mga PBA fans ang panagharong sa duha ka giisip nga labing maayong point guards sa liga.
Sila si TNT KaTropa star Jayson Castro ug Barangay Ginebra Kings leading scorer Stanley Pringle mag-abot karon sa pagsugod sa ilang "best-of-five" semifinal series didto sa Smart Araneta Coliseum.
Ang TNT miabante sa semifinal human nila gipilde ang Alaska Aces sa iskor nga 104-93 niadtong Miyerkules, samtang ang Ginebra sayong misud sa Final Four human nila gisilhig ang Magnolia Hotshots.
Interesante ang match-up sa No. 3 nga Ginebra ug topseed nga TNT tungod kay pulos sila gibidahan sa mga scorers nga nakita ni PBA Commissioner Willie Marcial nga mamahimong sikit ug kulbahinam ang serye tali sa duha.
Sa labing unang higayon, mag-atbang sa usa ka playoff series ang duha ka kanhi Gilas cagers nga sila si Castro ug Pringle.
Si Castro maoy leading local scorer sa TNT, samtang si Pringle nahimong sinaligan sa opensa sa Ginebra sukad nga miabot siya sa koponan pinaagi sa trade tali NorthPort Batang Pier. Gawas sa duha, magbangga usab ang uban nga mga key players sama nila ni RR Pogoy, Troy Rosario ug import Terrence Jones Jr. sa TNT batok nila ni Ginebra stars LA Tenorio, Japeth Aguilar ug Best Import Justin Brownlee.