CEBU, Philippines – Sa ika-11 nga higayon, ang Amerikanong si Kenny Bayless mao moreperi sa away ni Manny Pacquiao.
Kini human si Bayless maoy gitudlo nga reperi sa WBA welterweight unification bout tali nilang Pacquiao ug Keith Thurman karong Hulyo 21 (oras dinhi sa Pilipinas) didto sa MGM Grand sa Las Vegas.
Ang 68-anyos nga si Bayless unang mitaak sa ring uban ni Pacquiao sa ikaduha niining engkuwentro batok ni Erik Morales niadtong 2006.
Sa miaging tuig, si Bayless maoy mireperi sa dihang gipalukapa ni Pacquiao si Lucas Matthysse sa ikapitong hugna aron sakmiton ang WBA regular welterweight title didto sa Kuala Lumpur, Malaysia.
Si Bayless sab maoy reperi sa sangka ni Pacquiao batok nilang Ricky Hatton, Miguel Cotto ug Shane Mosley.
Sa higayon nga si Bayless maoy reperi, si Pacquiao walo ka higayon nga midaog ug kaduha lamang mapilde nga iyang nahiaguman sa mga kamot ni Juan Manuel Marquez niadtong 2012 ug Floyd Mayweather Jr. niadtong 2015.