CEBU, Philippines – Nakauna ang Golden State Warriors dihang ilang gilubong ang Portland Trail Blazers, 116-94 sa Game-1 sa NBA Western Conference finals kagahapon didto sa Oracle Arena sa Oakland, California.
Si Stephen Curry miposa og siyam ka tres sa iyang 36 puntos nga gidayandayanan og pito ka assists ug unom ka rebounds aron pangulohan ang Warriors nga maoy pirmeng naglabaw gikan sa pagsugod batok sa Trail Blazers nga daw sa gibati pa og kaluya human mihaw-as gikan sa Game-7 nga kadaogan batok sa Denver Nuggets sa second round sa playoffs nga nasagulan pa og makutas nga upat ka overtime.
"The schedule favored us," angkon pa ni Golden State coach Steve Kerr. "I thought we took advantage of the situation and got off to a good start."
Gawas sa dalaygon niyang depensa, si Klay Thompson mitampo sab og 26 puntos alang sa Warriors nga mipakita sa ilang katakus ug kalibre sa usa ka two-time defending champion bisan og wala ang usa sa ilang superstar nga si Kevin Durant kay nagpaalim pa sa iyang injury.
Wala sab magpa-alkansi si Draymond Green nga miamot og 12 puntos, 10 ka rebounds lima ka assists, tulo ka blocks ug duha ka steals sa Warriors nga miduwa sa ikalima nilang sagunson nga West finals.
Parehong namugnaw ang duha ka bitoon sa Portland nga sila si Damian Lillard ug CJ McCollum. Si Lilliard mitapos uban ang 19 puntos, unom ka assists ug upat ka rebounds, apan dunay pito ka turnovers ug mipasud lamang og upat sa 12 niya ka itsa. Samtang si McCollum mihipos og 17 puntos, apan milansang og pito lamang sa 19 niya ka tira.
Ang Blazers igo lamang nakasikit sa iskor nga 45-48 gumikan kay si Curry mitusak og duha ka sunod-sunod nga tres aron paghatag og 54-45 nga labaw sa Warriors sa halftime.
Ang Warriors mipaburot sa ilang labaw ngadto sa 17 puntos. Mipaduol man tuod ang Blazers ngadto sa sayes puntos, apan mao na kadto ang katapusan nilang utong gumikan kay nagmangtas ang Warriors sa katapusang kuwarter diin sa usa ka higayon miabante sila og 22 puntos.
Ang Game-2 sa best-of-seven series gikatakda karong Biyernes didto gihapon sa korte sa Warriors.