CEBU, Philippines — Ang Dragon Warriors nga gilangkuban sa mga sakop sa Philippine Army mipakita sa ilang kusug dihang gidominaran nila ang Cebu City Dragon Boat Regatta kagahapon didto sa IL Corso sa South Road Properties.
Ang Dragon Warriors nga nagbase sa Manila maoy kampiyon sa tulo ka dibisyon nga mao ang premiere open, mixed ug women's division.
Ang Army ladies unang misakmit og korona sa gipaspason nga 58 minutos ug uno segundo. Second placer ang Kujaw Tiger Dragons sa oras nga 1:00m, samtang ang Umagu-Dumaguete City ikatulo sa oras nga 1:01.
Giangkon nila ang ikaduhang titulo atol sa mixed category dihang mirehistro sila og oras nga 54.60 aron mapilde ang Black Manta Warriors sa Lapu-Lapu nga adunay oras nga 55.07, samtang ang SJ Banatti sa Negros maoy ikatulo sa oras nga 55.41.
Ang Army paddlers, nga maoy mireprensetar sa nasud sa miaging 14th World Dragon Boat Championship, wala usab magpapugong dihang giharian nila ang premier open sa oras nga 52.37. Nagsunod kanila ang Dumaguete Yellowfins (53.23) ug Braveheart sa Cagayan De Oro City (54.09).