CEBU, Philippines – Suwayan ni ALA fighter Jonas 'Zorro' Sultan nga pandayon pagbalik ang taytayan paingon sa world title sa iyang pakigsangka ni South African Athenkosi Dumezweni sa Abril 28 didto sa Orient Theatre sa South Africa.
Dako kini nga away alang ni Sultan tungod kay sangkaon niya si Dumdezweni alang sa bakanteng WBC silver super flyweight title.
Si Sultan lab-as pa sa iyang unanimous decision nga kadaogan batok ni Ardin Diale niadtong Nobiyembre sa miaging tuig diha sa IEC Convention Center sa Barangay Mabolo, Dakbayan sa Sugbo.
Ang 27-anyos nga si Sultan miaway usab sa miaging tuig alang sa IBF title, apan napilde ngadto ni defending champion Jerwin Ancajas pinaagi sa puntos.
Si Sultan adunay record nga 15-4, 9KOs, samtang si Dumezweni adunay 11-2,8KOs nga baraha.