CEBU, Philippines — Ang NBA 'Rookie of the Year' nga si Ben Simmons ug ang kasamtangang kandidato sa maong pasidungog karong season nga si Luka Doncic naglangkob sa mga batan-ong talento nga ginganlan sa liga aron mopakita'g aksiyon sa Rising Stars challenge nga usa sa mga giatngang pasundayag sa All-Star weekend sunod bulan didto sa Charlotte, North Carolina.
Ang star guard sa Philadelphia 76ers nga si Simmons, lumad gikan sa Australia ug ang bitoong rookie sa Dallas Mavericks nga si Doncic, garbo sa Slovenia, maoy mobida sa World Team sa duwa diin ilang sangkaon ang mga pambato sa Amerika.
Sila si Simmons ug Doncic makig-alyansa sa World Team nilang Toronto Raptors forward OG Anunoby (United
Kingdom), Phoenix Suns center Deandre Ayton (Bahamas), Sacramento Kings guard Bogdan Bogdanovic (Serbia), LA Clippers guard Shai Gilgeous-Alexander (Canada), Brooklyn Nets forward Rodions Kurucs (Latvia), Chicago Bulls forward Lauri Markkanen (Finland), Minnesota Timberwolves guard Josh Okogie (Nigeria) ug Cleveland Cavaliers forward Cedi Osman (Turkey).
Ilang banggaon ang Team USA nga gibitoonan nilang Donovan Mitchell sa Utah Jazz, Brooklyn Nets center Jarrett Allen, Sacramento Kings forward Marvin Bagley ug guard De'Aaron Fox, Los Angeles Lakers guard Lonzo Ball ug forward Kyle Kuzma, Atlanta Hawks forward/center John Collins ug guard Trae Young, Memphis Grizzlies forward/center Jaren Jackson ug Boston Celtics forward Jayson Tatum.
Si Kyrie Irving sa Boston Celtics maoy mo-coach sa Team USA, samtang si Dirk Nowitzki sa Mavs maoy modala sa Team, World.
Sa miaging tuig, si Bogdanovic maoy gibayaw nga MVP sa dihang gipukan sa Team World Team ang Team USA, 155-124.