CEBU, Philippines – Mohimo na sa iyang season debut sa Enero 18 ang All-Star center nga si DeMarcus Cousins uban sa Golden State Warriors. Ang 6-foot-10 nga si Cousins mopakita og aksyon sa labing unang higayun sukad nga gibuhian siya sa New Orleans Pelicans sa miaging offseason ug nakahukom nga mopirma og one-year contract sa Warriors.
Sa pagduwa sa 28-anyos nga si Cousins, mamahimo na nga lima ka All-Stars ang aktibo nga moduwa unya sa korte alang sa Warriors.
Daghan ang gaatang sa pagduwa ni Cousins tungod kay sutaon kung haom ba kini sa 'run and gun' nga gameplay sa Warriors. Nailhan nga si Cousins usa ka post-up player.
Gawas niini, atangan usab kung hingpit na ba nga nakarekober si Cousins sa iyang achilles injury nga maoy rasun sa dugay niya nga pagkawagtang. Si Cousins naghinam-hinam na nga moduwa uban nila ni Kevin Durant, Steph Curry, Klay Thompson ug Draymond Green.
Ang defending champion makigharung sa laing lig-ong koponan sa West nga Los Angeles Clippers sa pagbalik ni Cousins.