CEBU, Philippines — Usa ka 'sweep' maoy buot nga buhaton sa Magnolia Hotshots batok sa top seed Barangay Ginebra Kings sa Game 3 sa ilang 'best-of-five' semifinal series sa PBA Governors Cup karong gabii.
Ang Magnolia miposte og 2-0 nga bentaha human ilang 101-97 nga kadaogan sa Game 2 niadtong Lunes ug gusto ni coach Chito Victolero haruson nila ang Ginebra aron dili sila mabutang sa peligro.
Si team captain Mark Barroca miingon nga ang kadaogan nila karon magsilbe nga bawos ngadto sa Ginebra nga mitagak kanila atol sa 2017 All-Filipino Cup.
Dugang pa ni Barroca nga salig siya sa ilang katakus nga modaog apan dili sila mokompiyansa ug mawala lang ang iyang kabalaka kun hingpit na nilang mataktak ang Ginebra.
Gawas ni Barroca, ang Hotshots mosandig sa import nilang si Romeo Travis, Jio Jalalon, Paul Lee ug Ian Sangalang.