CEBU, Philippines — Ang Cleveland Cavaliers mipalagpot sa ilang head coach nga si Tyronn Lue human sila makaangkon sa labing bati nga rekord sa liga uban ang unom ka sagunson nga pilde.
Gipahibalo ni Cavaliers general manager Koby Altman ang ilang desisyon human gipakaging sa Indiana Pacers ang Cavs, 119-107 niadtong Sabado.
Dungan niini, ilang gisaka si associate coach Larry Drew ngadto sa interim coach.
"This was a very difficult decision. It is especially so, considering Coach Lue's time with us over the last four years, including
four straight trips to the NBA Finals," matud pa ni Altman.
Si Lue nahimong head coach sa Cavs niadtong 2016 human sa pagkatagak ni Dave Blatt. Ubos sa liderato ni LeBron James, iyang gitimon ang Cavs ngadto sa labing una niining kampiyonato sa NBA.
Apan daw nausab na ang templada sa duwa sa Cavs karon nga wala na uban kanila si James nga niadtong Hulyo mitapon sa Los Angles Lakers.
Ang Cavaliers mapasalamaton ngadto ni Lue gumikan sa dako niining nahimo ug nahatag nga kaayohan sa dihang nagsilbe pa kini sa ilang organisasyon.
Ang 41-anyos nga si Lue mirehistro og 128-83 win-loss record sa duha ug tunga niya ka season sa Cavs. (BANAT NEWS)