CEBU, Philippines — Milampos ang University of Cebu pagsakmit pagbalik sa overall championship sa 23rd Milo Little Olympics Visayas Finals.
Gibawsan sa UC ang karibal nga University of San Carlos nga ilang gipalagpot sa trono. Ang UC mitali og 199 points sa secondary ug 85 points sa elementary division.
Bisan pa og midominar na sila sa MLO sa mga miaging katuigan, kini ang unang higayun sa UC nga mudaog sa elementary division.
Ang UC mao karon ang ikaduhang koponan sa kasaysayan sa maong multi-sporting event nga miangkon og double-championship sa sekondarya ug elementarya sunod sa USC.
Ang USC maoy ikaduha sa secondary sa ilang 126 points, samtang ang Abellana National School maoy ikatulo sa ilang 104.67 points.
Gasunod sa UC sa elementary division mao ang Sacred Heart School-Ateneo de Cebu nga adunay 69.67 points ug ang Colegio Del Sto. Niño-Cebu misakmit sa third place sa ilang 64 points.
"The disparity of the points of our overall performance especially in the elementary was still unbelievable for me, I was so amazed...we only joined five sporting events in the elementary," matud pa ni UC athletics director Jessica Honoridez.
Gawas sa overall championship, pipila usab ka mga atleta sa UC ang midaog sa Most Outstanding Athletes award nga naglakip nila ni Martchan Torregosa ug Crystal Villanueva sa athletics, chess player Marphine Faith Mangubat, gymnasts Benedict Kail Soronio ug Elijah Miguel Cababan, karateka Zaki Louis Bullo ug Arianne Caballes, Melanie Galleon, Dominique Henze Lucero ug Mikylla Therese Dinavanao sa table tennis. (BANAT NEWS)