CEBU, Philippines — Napiling flag-bearer sa Philippine team si Margielyn Arda Didal atol unya sa closing ceremony sa 18th Asian Games ugmang adlawa didto sa Jakarta, Indonesia.
Ang Sugboanang skateboarder nga si Didal gihatagan sa maong responsibilidad nga modala sa bandera sa Pilipinas sa tradisyonal nga parada human maka-gold sa women's skateboarding event niadtong Miyerkules.
Atol sa opening ceremony, ang Fil-American ug Cleveland Cavaliers point guard nga si Jordan Clarkson maoy midala sa bandera sa nasud.
Ang 19-anyos nga si Didal maoy ikaupat nga atleta nga mihatag og bulawang medalya sa Pilipinas ug nalabwan na nila ang 21st place finish sa 2014 Asian Games.
Mismo si Phl team chief-de-mission Richard Gomez miingon nga krusyal ang pagdaog ni Didal sa gold medal tungod kay mao kini nakahaw-as kanila gikan sa top 20 sa medal standing.