CEBU, Philippines — Pambato sa Pilipinas nga si Daniel Caluag pakyas pagdepensa sa iyang titulo ug igo lang misakmit og bronze medal sa BMX event sa Asian Games kagahapon didto sa Indonesia.
Si Caluag gilauman unta nga mosubli sa iyang gold medal performance niadtong tuig 2014 sa Incheon Asian Games, apan napuhalan siya sa pambato sa Japan nga si Nagasako Yoshitaku nga maoy mikampiyon, samtang ang Indonesian nga si Gusti Bagus Saputra maoy silver medalist.
"It's not the result I wanted. I came in wanting gold, that was the vision. But Yoshi from Japan came in strong. I knew he was going to be my biggest competitor here," matud pa ni Caluag sa The Philippine Star.
Ang bronze nga nadaog ni Caluag maoy ikapito sa Pilipinas. Ang Pilipinas kasamtangan nga nahimutang sa ika-21 nga dapit sa medal standing uban ang usa ka gold ug pito ka bronze medals.