CEBU, Philippines – Ang world-ranked No. 2 nga sila si Timur Imametdinov ug Nina Bezzubova sa Germany maoy mangulo sa listahan sa langyaw nga mga manayaway nga mopakita sa ilang abilidad sa World DanceSport Federation (WDSF) Cebu Open 2018 ug 10th Dancesport sa Sugbu karong Septiyembre 8 diha sa Waterfront-Cebu City Hotel and Casino.
Bisan sa kahigpit sa ilang iskedyul, sila si Imametdinov ug Bezzubova mopadayon gyud sa ilang pagsalmot sa tinuig nga kompetisyon gumikan kay dili sila gusto nga madismaya ang gatosan ka lokal nilang mga fans nga naghinamhinam mosaksi sa ilang talento sa pagsadsad.
Gawas sa mga German, lain pang mga dekalibreng entrante gikan sa gawas sa nasud mao sila si Barden Brodie ug Lana Skgic-De Fonseka ug Chris Boon ug Dale Zhao sa Australia, Hochng Lee ug Yerim Ong sa Korea, Ezhov Semen ug Maria Butuzova sa Russia, Nguyen Mich Truang Doon ug Nguyen Nha Uyen Trang sa Vietnam ug Ganbahtar Temuuleon ug Buyandelger sa Mongolia.
Ang notadong Hapon nga mga dancers nga sila si Hidaeki Kishi ug Shiho Tanaka nga world ranked no. 9 sa senior division, mopakita sab og aksiyon uban ang ilang crew nga modokumento dili lamang sa ilang performances, apan hasta sa grassroots program sa DanceSport Team Cebu City.
Gawas sa WDSF Open, duna sa'y Asian Open.
Miabot ngadto sa 36 ka mga kategoriya ang kumbatihan, apil na ang Cebu Schools Athletic Foundation, Inc. (CESAFI) inter-school competition ug ang parent-child special category.