CEBU, Philippines — Sila si Marivic Mari ug Desiderio Engbino maoy labing unang kampiyon sa Cebu North 50 Ultra Marathon didto sa Dakbayan sa Bogo.
Si Mari sa Team Any Day Runner mitapos sa makutas nga lumba sulod sa lima ka oras, 54 minutos ug 54 segundos. Nagsunod niya si Mary Claire Maranga sa oras nga 6:08:05. Si Lilian Racuya nga mioras og 6:34:11 mipahiluna sa ikatulong dapit.
Mikompleto sa top 10 sa women's class mao sila si Noemi Menchavez (6:34:16) Celeste Guido (6:36:35), Jocelyn Ycong (6:49:47), Cheryl Potot (7:01:17), Jessie Ejoc (7:03:46), Marie Jessa Sepe (7:14:34) ug EJ Zabala (7:20:51).
Si Engbino sa iyang bahin, mihari sa men's division human niya gitapos ang lumba sa oras nga 3:55:50. Gipilde niya si Edil Batiancila (4:05:53) ug Isidro Moradas (4:42:28) nga milandig sa ikaduha ug ikatulo nga dapit.
Ang ikaupat ngadto sa ika-10 nga dapit gipanag-iya nila ni AJ Mercado (4:54:33), Candelario Logroño (5:08:10) Robei Catat (5:08:10), Michael Saplao (5:12:35), Jomil Rollon (5:17:38), Ranie Kiamco (5:24:29) ug Peri Pevida (5:26:50).
Sa 25K category, sila si Vicencio Narca (1:40:54) ug Filrose Mejorada (2:30:57) maoy labing kusog sa ilang tagsa-tagsa nila ka dibisyon. (BANAT NEWS)