CEBU, Philippines – Daw hapit na maupos ang oras ni Kawhi Leonard uban sa San Antonio Spurs.
Usa ka kasaligang tinubdan sa The Associated Press nga pamilyar sa sitwasyon nagkanayon nga si Leonard mipadayag na sa Spurs nga gusto siyang magpa-trade karong summer.
Timailhan kini nga daw dili na mahilot pa ang relasyon tali sa Spurs ug sa All-Star forward.
Matud pa sa maong tinubdan nga si Leonard dili na malipayon uban sa Spurs mao nang nagtinguha kini nga motapon sa laing team nga interesado sa iyang serbisyo.
Si Leonard nakaduwa sud lamang sa siyam ka duwa uban sa Spurs sa miaging season gumikan sa injury sa iyang paa.
Niadtong 2016-2017 season, mi-average siya og career-high 25.5 points ug maoy ikatulo sa botasyon pagka-MVP.
Si Leonard garantisado nga modawat og $20 million sa sunod nga NBA season ug mahimo siyang free agent unya pa sa Hulyo 2019.
Wala pa hinuon matino kun ang Spurs mosanong ba sa hangyo sa 2014 NBA Finals MVP ug two-time Defensive Player of the Year.