CEBU, Philippines — Mipirma na si Andrew Bogut og duha ka tuig nga kontrata uban sa Sydney Kings nga pormal nagtak-op sa mabulukon niyang karera sa NBA.
Si Bogut, usa sa labing banggiitan nga basketbolista sa kasaysayan sa ilang nasud, nagkanayon nga nagpanikad na siyang moduwa sa yuta niyang natawhan sa sunod nga duha ka season sa gihulagway sa Kings nga labing dako nga kasabotan sa National Basketball League.
Wala hinuon gibutyag sa Kings kun pilay ilang bayad ni Bogut nga 13 ka tuig nga beterano sa NBA.
Si Bogut maoy labing unang basketbolista gikan sa Australia nga nahimong No. 1 overall pick sa NBA Draft sa dihang gipili siya sa Milwaukee Bucks niadtong 2005. Human sa pito ka tuig sa Bucks, gi-trade siya ngadto sa Golden State Warriors diin siya nakadaog og kampiyonato niadtong 2015.
Si Bogut gilabay ra sab dayon ngadto sa Dallas Mavericks pagka sunod tuig ug human sa usa ka season mitikang siya sa Cleveland diin naangol ang wala niyang tiil pipila pa lamang ka segundos ang mipitik atol sa iyang Cavs debut.
Sa naghinapos nga bahin sa miaging tuig, si Bogut mipirma og kontrata uban sa Los Angeles Lakers, apan gi-waive ra sab dayon siya niini.