CEBU, Philippines – Mopakita na sa ilang abilidad ang Cebu Darters United (CDU) sa dihang ang Philippine Open Tacloban, usa ka international dart tournament mosikad karong adlawa didto sa Leyte Academic Center sa Barangay Pawing sa Palo, Leyte.
“We are a hundred percent ready for the competition,” matud pa ni CDU founder ug team captain Ramon Alcoseba.
Maglaum si Alcoseba nga makahimo sila og maayong resulta ning duha ka adlaw nga kompetisyon nga salmotan sa mga banggiitang darters gikan sa nagkalain-laing kanasoran.
Uban ni Alcoseba sa 16-man CDU line-up mao sila si Roy Laude, Roniel Pedrosa ug Odong Pamati-an, Junjun Monsanto, Boyt Campugan, Reyden Colina, William Ugang Jr., Dino Bacayo, Arvic Recana, Cyrus Cabungcag, Shayne Cathalia Soquiño, Mike Silvero, Jojo Morados, Elmer Jarantilla ug ang 16-anyos nga si Gilbert Bejec.
Ang CDU mosalmot sa tanang kategoriya, ang 4-man team, 3-man team, singles, doubles, senior ug youth division.
Dili momenos sa P5 milyones ang gitagana nga ganti nga iapud-apod ngadto sa mga mananaog sa maong torneyo nga gipasiugdahan sa Darts Organization of Tacloban (DOT) uban sa pagtugot gikan sa National Darts Federation of the Philippines (NDFP).