CEBU, Philippines — Nag-una gihapon si James Harden sa Houston Rockets sa karera pagka-Most Valuable Player karon nga NBA season.
Dako ang gikuptan nga papel ni Harden pag-angkon sa Rockets sa numero unong puwesto sa Western Conference. Siya maoy nangu sa 17 ka sagunson nga daog sa Houston nga maoy labing taas nga ratsada sa usa ka team niini nga season.
Si Harden sab maoy nag-una sa pinuntosay sa liga uban ang 30.6 points matag duwa ug ikatulo sa assists uban ang 8.7 assists matag duwa.
Apan sukwahi sa miaging tuig diin sila lamang si Russell Westbrook sa Oklahoma City Thunder ang nagtige pagka-MVP, upat ka dekalibreng mga pangan ang makabangga ni Harden ning higayona alang sa maong prestihiyosong dungog.
Sila mao si Damian Lillard sa Portland TrailBlazers, LeBron James sa Cleveland Cavaliers, Anthony Davis sa New Orleans Pelicans ug Stephen Curry sa Golden State Warriors.
Si Lillard migiya sa Blazers ngadto sa ikatulong dapit sa lig-on kaayong West. Mao kini ang hinungdan nganong apil siya sa mga gihisgutan aron ma-MVP.
Samtang si Davis mipakita sa iyang katakus hinungdan nga padayong tulin nga naglawig ang Pelicans bisan og wala na makaduwa uban kanila ang na-injured nga si DeMarcus Cousins.
Impresibo ang mga numero nga gibuhian ni Davis 28.2 points, 11.1 rebounds ug 2.5 blocks matag duwa.
Lain pang lig-on nga kandidato mao si James. Bisan og gihamok og injury, ang Cavs gikahadlokan gihapon gumikan sa liderato ni James nga mipatik og ‘triple-double’ average niadtong Pebrero uban ang 27 points, 10.5 assists ug 10.5 rebounds matag duwa.
Angayan sab nga bantayan si Curry nga miposte og 26.4 points, 6.1 assists ug 5.1 rebounds matag duwa. Nagpabilin siyang sentro sa opensiba sa Warriors hinungdan nga gikonsidera gihapon nga ma-MVP.